【投資專欄】 雖然通常債息倒掛一排先會股災⋯但市場似會繼續向下，再縮減倉位（弩飛投資）

Yield curve inversion係市場上公認為最準確嘅熊市leading indicator，分析員普遍認為熊市訊號出現咗之後同大跌市中間仍然有時間差，大家唔使咁緊張住。但我覺得現階段下行風險比上行風險大，所以決定再縮減倉位

睇返Ray Dalio嘅新書Changing World Order，始終美國霸主地位同美元係國際貨幣仍然係主軸，所以美國理應充分利用呢個優勢。對於美國來講，Game Plan係環球資金唔好離開，之前嘅做法係透過低息環境、低通脹吸引資金持續流入美國股市，但隨着通脹高企（今次係supply side出事，美國單方面解決唔到，所以要喺demand side出手），透過股市鎖住資金嘅難度提升。因此Fed嘅打法急劇轉變，口風由鴿變鷹（市場price in咁嚟緊每次會議都加50點子）將吸引資金嘅媒介由股市轉向美金

兩個重點：

1）美國股市跌其實冇乜問題，只要佢每次跌嘅幅度少過其他國家，下次資金再次進入股市，美國股市嘅反彈力同吸納資金嘅能力仍然會係最強

2）透過大量加息，美金變得比其他貨幣吸引（美國10年期債息眨吓眼就高過中國10年期債食），因此從股市流出黎嘅資金，未必係股市之間嘅輪動（增長轉價值），可以直接cash out

所以根據以上嘅諗法，弩飛擔心市場講緊嘅中港市場增長轉價值輪動未必係資金嚟緊嘅走勢，而係有誘因直接cash out，所以再將倉位減到20%，減低手頭上只係用嚟防守嘅嘅價值股（其實佢哋今個月已經做得好好，恆指跌10%，佢哋能夠打和）

P.S.1 現時嘅打法都係以防守同減少操作為主，現時ytd輸緊3%，仍然保持到2020年大部份嘅盈利，希望過咗呢個寒冬之後再搵機會！大家一齊加油！

P.S.2 第二隻腳的確出現咗，但隨着市場傳緊疫症有機會係北京嗰邊失守，大家擔心緊北京會唔會係下一個上海，可以留意番A股三大指數已經破底

＊文章獲弩飛投資授權刊登，原標題為《美元吸引力上升 》

免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。