【投資專欄】 最後逃生門?加倉到四成!避開醫療、消費股,押注「硬科技」(弩飛投資)

投資專欄
【投資專欄】 最後逃生門?加倉到四成!避開醫療、消費股,押注「硬科技」(弩飛投資)

先講吓點樣避開個跌市(因為六月尾嘅時候本來仲係睇好,點解突然之間清晒醫療科技,再買埋7500)。簡單啲來講,其實大市同埋每一隻股票,喺我認知嘅基本面入面,有一個合理同極端嘅估值範圍,當極端嘅估值都跌破,就應該出現「something more than that」嘅基本面改變,我會跟住受影響嘅股票同行業去大膽假設背後有乜嘢我未知嘅基本面變化。

咁上星期見到政府打壓嘅力都好強,而且冇乜托市嘅意欲,所以就估有冇機會係金融戰,但其實都只係透過表面現象「猜想」背後嘅動機。當背後嘅原因開始清晰,雖然假設嘅動機唔完全正確,但至少避開咗VIE模型、中概股、高估值增長股嘅跌幅,同埋買入左有機會啱趨勢嘅股票。

至於大市嘅睇法同埋近排嘅操作:其實當政府開始托市之後,我發現「金融戰」嘅估計錯咗,所以就平哂所有7500,食咗二千幾點就算(雖然上一篇文仲係講緊strong hold⋯但因為大市向下既conviction變咗,所以好快就flip hand),倉位亦都瞬間提升到四成幾:手頭上都係電動車、太陽能、A股ETF、增長行業龍頭、硬科技。

有唔少人認為呢個反彈係「最後嘅逃生門」,我覺得一半一半。跟返上一篇文嘅思路,未有盈利嘅軟科技增長股真係有可能係「最後嘅逃生門」;但一啲有盈利嘅增長行業龍頭,有可能被殺錯估值(例如藥明生物),造成買入機會,但未來股價嘅爆發力可能減弱左;反而「硬科技」嘅估值多咗好多幻想空間,今日一開市已經見到資金追入。幸好先前追入嘅股票,雖然經歷咗500點嘅調整,都高於買入價。

行業方面,有專家認為醫療同消費嚟緊有機會被打壓,所以要開始小心;汽車方面,開始諗緊比亞迪(1211)呢啲擁有「硬科技」嘅公司會唔會做得比經銷商好;我甚至諗緊若果開啟「德國模式」,騰訊同阿里被持續打壓,傳統金融業可能有機會番生。話時話,我而家最重倉係濰柴動力(2338),已經入咗兩注,睇埋業績會唔會入最後一注。仲有,北水南水所買入嘅股票同以前唔同晒,大家可以留意下。

最後,我而家就係觀察緊第二隻腳嘅情況,正如之前「特斯拉閥」嘅比喻,升幾多其實我唔係好理會,反而係調整嘅時候係唔係有秩序更加重要。若果第二隻腳企得穩,我先考慮將倉位再推過四成。現時我最擔心嘅係中美兩邊嘅十年期債息不停向下,好似開始有啲risk off嘅機會,有人話嚟緊變種嘅delta喺嚟緊兩三個星期有機會衝擊市場,我哋拭目以待。

*文章獲 弩飛投資 授權刊登,原標題為《最後逃生門?加倉到四成!

免責聲明:本網刊載的所有投資意見,只可作參考用途。讀者在作出投資決定前理應審慎,並主動掌握市場最新狀況。若不幸招致任何損失,概與本網無關。而本集團旗下網站或社交平台的網誌內容及觀點,僅屬筆者個人意見,與本集團立場無關。本集團旗下網站對因上述人士張貼之資訊內容所帶來之損失或損害概不負責。


即刻follow我地Facebook同Instagram,隨時接收最新資訊!

你可能感興趣