【投資專欄】 咩股依然值得重倉?精選3隻重型機械股、非四大行內銀股(弩飛投資)

投資專欄
弩飛投資

喺上個星期一嘅文章《最後逃生門?加倉到四成》 提到我入咗唔同行業嘅貨,去感受一下唔同行業龍頭嘅「特斯拉閥」嘅情況。由於買入價比較低,所以反彈之後平均都有10%嘅升幅(百濟神州比較誇張,有20%),但係有唔少行業後繼不勁,只有少數仍然有上升動力,所以決定集中加倉係兩個行業,將倉位推到六成:

1)重型機械

放眼下半年,中國嘅三頭馬車之中(消費、出口、基建)有兩頭表現將會麻麻哋:消費方面,有調查發現大部份市民嚟緊都選擇增加儲蓄、減少消費;出口方面,中國提早脫離疫症影響所獲得嘅出口紅利,喺其他國家開始復工嘅情況下逐漸散去,所以要穩住經濟嘅話,其實最後都係靠基建,而地方政府發債高峰期相信會係Q3。

係呢個行業,我揀咗三箭頭,分別係濰柴動力(2338)、三一重工(600031)、中聯重科(1157),都已經入到第二第三注。一嚟係佢哋嘅估值去返合理水平,大約喺中間偏低嘅位;二嚟佢哋都符合「硬科技」嘅國策最新趨勢,各有各啱科技嘅實力:濰柴動力開始商業化氫燃料電池(我都明其實冇咁快,但係我嘅入市位最低去到$17,唔介意等多一陣),對應碳中和嘅趨勢,係有佢嘅價值;三一重工被譽為「機械茅」,唔單只係國內加到價,喺海外定單接到手軟,出口同比增長一倍;中聯重科嘅搭機智能工廠,上半年一直處於full capacity嘅狀態,銷量亦都係世界第一。

原本我諗住濰柴動力已經唔錯,所以原先比較大嘅注碼放咗入去,但係研究落先發現三一同埋中聯重科都非常優勝,所以加注嘅時候將三間公司推到相同銀碼。

2)內銀

由於政府多方面嘅行業監管,相信有一部份必須放喺中國地區嘅資金會尋找低政策風險嘅行業嚟park cash,其中一個相信就去銀行:一嚟喺疫症初期,佢哋已經要捱義氣,讓利比其他行業;二嚟當網絡金融受到監管,佢哋調返轉有機會得益。

睇返而家嘅估值,無論係用P/B定係股息計算,都係平得非常誇張(四大行嘅P/B通常都係0.8至1.2倍之間遊走,依家係0.3至0.5倍,股息仲要去到7-8厘),大部份投行都係用DDM去計,其實點計都平㗎啦。

喺銀行入邊,我現時最重倉嘅係郵儲銀行(1658),第二重倉招商銀行(3968),而非四大行。主要原因係,當阿爺透過減RRR釋放流動性之後,其實四大行係用唔晒啲錢,所以會將一部份嘅錢放入去國債,當大家同時間咁做,國債嘅收益率會向下,導致佢哋整體收益都差咗。反而郵儲同招商用得晒啲錢,對業務係有幫助。

至於點解係郵儲銀行,基本面就唔講咁多啦,催化劑其實有兩個:一嚟13/8會出業績(其他銀行應該16/8出),銀保監會(CBIRC)都講咗係盈利增長同壞帳減少嘅情況下,銀行嘅第二季盈利應該唔錯;二嚟我嘅買價仲要平過李祿大lot嘅買價,佢兩成$4.22入,八成$5.34入,希望有足夠嘅防守力!

*文章獲 弩飛投資 授權刊登,原標題為《近期較重倉嘅行業:重型機械 & 內銀

免責聲明:本網刊載的所有投資意見,只可作參考用途。讀者在作出投資決定前理應審慎,並主動掌握市場最新狀況。若不幸招致任何損失,概與本網無關。而本集團旗下網站或社交平台的網誌內容及觀點,僅屬筆者個人意見,與本集團立場無關。本集團旗下網站對因上述人士張貼之資訊內容所帶來之損失或損害概不負責。


即刻follow我地Facebook同Instagram,隨時接收最新資訊!

你可能感興趣