【投資專欄】加息、收水、中美關係都係可控範圍:南非變種病毒會令全球再次risk off?(弩飛投資)

投資專欄
【投資專欄】加息、收水、中美關係都係可控範圍:南非變種病毒會令全球再次risk off?(弩飛投資)

過去兩個月,港股一直係低位浮浮沉沉,而過往兩個月三次嘅調整,弩飛分別將倉位逐步加上,由六成到八成到而家九成幾,有趣嘅係雖然指數不停向下,但整體嘅PnL一次比一次高(應該贏多咗指數7%),想同大家拆解番背後嘅諗法:

原先諗住若果資金返嚟,通常會先選擇大型優質股,有更加多資金先會流入去中型股/質素普通嘅股票。但係再諗一諗,短期來講資金有限,資金係咁嘅情況應該寧願揀值搏率較高嘅股票。

優質嘅公司,估值雖然做咗一定嘅調整,但係未來盈利增長一定減低,能見度亦都減少,因此估值即使由+3sd降至+1sd,未來重回+3sd或者跌到-1sd嘅機會都係一半一半,升跌比率都係2sd:2sd,即係1:1。

至於質素普通嘅公司,估值已經跌到體無完膚,講緊可能佢跌到-3sd,而大家對佢嘅盈利已經冇乜期望,若果再調整,頂多咪去到-3.5sd,但係只要負面情緒減弱,輕輕鬆鬆彈返去-1sd,升跌比率2sd:0.5sd,4:1抵搏好多!

拆解番自己投資組合嘅情況,留意到優質股(佔組合25%)同指數走勢一致(例如騰訊、美團、安踏、信達、百濟),甚至更差(例如碧服、藥明生物);反而質素普通嘅公司(佔組合75%)升勢非常凌厲,例如前兩三個月入嘅雷蛇(1337)、中國建築(3311)、金界(3918),到近排買嘅思摩爾(6969)、比亞迪電子(285)。

其實我一直都認為,好多人為嘅嘢(加息、收水、中美關係)所構成嘅調整都係可控範圍之內,可以透過揀股同控制注碼頂住,因此先將倉位打到咁大。但係去到星期五開市嘅時候,望住Bloomberg彈出嚟嘅即時新聞,見到唔同嘅國家一個接一個開始封鎖對南非嘅航空班次,心諗:「當全球諗住有疫苗同口服藥嘅情況下,已經諗住re-opening嘅操作,呢隻omicron有機會導致全球再次risk off」。所以唯有改變策略,將re-opening trade嘅股票沽走,再沽一定數量嘅期指減低overall exposure,過週末睇清楚omicron有幾大鑊先。

後記:雷蛇(1337)非常凶險,之前部署左佢re-listing嘅trade,由$1.6重倉揸到上去$3,由於認為re-listing最後個decision point係喺陳生嗰度,omicron有機會影響佢嘅決定,所以急急放咗八成幾貨,放完之後15分鐘,見佢突然閃跌咗29%,我嚇到嗌咗出嚟(嗰一下有啲坐過山車好勁離心力嘅感覺⋯),close shave….

*文章獲 弩飛投資 授權刊登,原標題為《黑色星期五前後嘅部署

免責聲明:本網刊載的所有投資意見,只可作參考用途。讀者在作出投資決定前理應審慎,並主動掌握市場最新狀況。若不幸招致任何損失,概與本網無關。而本集團旗下網站或社交平台的網誌內容及觀點,僅屬筆者個人意見,與本集團立場無關。本集團旗下網站對因上述人士張貼之資訊內容所帶來之損失或損害概不負責。


即刻follow我地Facebook同Instagram,隨時接收最新資訊!

你可能感興趣