【投資專欄】點解可口可樂可以歷久不衰？獨家配方係原因，但有個更強大「護城河」（弩飛投資）

頭先飲可樂嘅時候，突然諗返起點解全世界只有兩個品牌獨大，分別係可口可樂同埋百事，而係冇比第三個比較出名嘅可樂品牌。有人會話因為可樂條配方係秘密，所以冇人複製到，呢個係佢嘅「護城河」。Well, yes and no啦，我覺得獨特嘅配方只係一開始構成品牌獨大嘅原因，但唔係現時守住護城河嘅主要因素：

一嚟其實有唔少公司抄佢嘅味道都抄到七七八八，二嚟即使係可口可樂本身，喺唔同地方嘅味道都有唔同（當年弩飛係analyst嘅時候，分別問過內地嘅可口可樂同埋金莎製造商點解香港同大陸唔同味，佢哋話雖然配方一樣但係原材料唔同，已經有分別），所以味道嘅獨特性已經唔係最大原因。

其實當中最大嘅護城河係成本優勢，過往有好多新冒起嘅可樂品牌（例如非常可樂）嘗試挑戰可口可樂同百事嘅地位。但最後會發現自己嘅成本價一直高於可口可樂同百事嘅零售價，所以係品牌唔夠強、但係價格更貴嘅情況下，其實好難搶到市佔率。

呢個令我諗翻起美團（3690）嘅情況，一開始Groupon興起嘅時候，毛利率去到40%，吸引咗好多公司去抄佢嘅生意模式，但係高毛利率所帶來嘅競爭，最後會影響返個毛利率。美團反而一開波就壓低毛利率，由一開始就不停增加efficiency，以量取勝。到咗而家，已經形成一個難以複製嘅生態圈。想挑戰美團嘅對手，同挑戰可口可樂一樣，efficiency同成本唔夠龍頭爭，而當中嘅「護城河」隨着時間越來越強。

In a nutshell，普遍對「護城河」嘅概念係一間公司有獨有嘅技術，令到佢嘅優勢難以被複製，因此可以享受高毛利（例如茅台），但係其實可樂同美團所擁有嘅護城河，唔一定係伴隨着高毛利率。

弩飛投資（前稱：路飛投資）簡介：專業投資者，前銀行分析員（香港/上海）中港長短倉策略 (0-140%倉位) ，主要希望透過記錄投資的思考過程，跟其他專業投資者交流。

＊文章獲弩飛投資授權刊登，文章標題受《Market Digest》更改，原標題：「護城河」一定有高毛利率？