【投資專欄】阿里下試百元關，早幾日業績有跡可尋，唔通芒格今次有排坐？（CFO講年報）

持續跟進爸爸業績，好認真去嗒真啲BaBa份第三季度業績，因為實在做得太差，想好認真去feel 吓，佢而家實際上究竟係咩情況。

1. 佢呢份第三季季績，俾管理層報喜嘅只係得一啲電商平台活躍用戶增長嘅數字，致於財務數字上，除咗總收入增長10%外，其他數據都係倒退咗好多。其實比起佢第二季，收入有37%嘅增長已經差好遠，佢第二季經營利潤都有增長，但係第三季竟然係倒退86%，相當大幅度。

2. 經營利潤同比跌86%已經離譜，而最驚嚇嘅係經營利潤率得3%（同比係22%），即係咁大間BaBa,開檔做咗成季100蚊生意，扣哂費用，利潤得嗰可憐嘅3蚊 （咁不如去做定期)。如果調整咗啲非經營費用，經營利潤同比都要跌25%， 調整咗嘅經營利潤率得21% （同比31%）一樣都好唔理想。

3. 由今季季績開始，BaBa 做咗個更詳細嘅披露，將分部業務重新分拆開：中國商業同埋國際商業，菜鳥、本地生活等。其實真係唔知有咩特別效果，通常人哋拆開係因為某個板塊業務開始增長，可以獨立展示佢嘅獨特性，唔會受其他較為弱嘅板塊數字所扭曲佢本身嘅業務情況。

4. 但係我睇唔到而家佢做咗個更詳細嘅披露之後有呢個效果，因為佢全部業務都係蝕緊錢，除咗電商（雲業務叫做只係僅僅breakeven）。但電商嘅經營利潤都大幅減少。拆嚟拆去都係蝕錢。可能佢想市場更認識佢嘅業務係好多元化，唔想只用簡單兩個字：「商業」來表達。或者係長遠佢真係對淘特、淘菜嗰啲有信心做得好，而家擺定出嚟先。

5. 而社區商業平台業務淘菜菜繼續滲透到欠發達地區，其實呢啲欠發達地區嘅消費能力應該好弱，會唔會有可觀嘅margin 呢？

6. 雲業務，本身叫做未來嘅增長亮點，但係今季佢話有一位頭部客戶，基於非產品相關嘅要求,停止採用佢哋嘅海外雲業務（其實中文我真係唔係好知咩叫頭部，睇番英文：top customer，咁明哂，即係有個大客無咗，唔同阿里做海外雲生意）。

7. 可能呢個係一次性嘅事件或者係啲個別事件，但係其實雲業務本身係呢個世界上都係寡頭壟斷，海外有Amazon 嘅AWS, 微軟嘅Azure,同埋Google GCP，幾乎已經壟斷晒，咁阿里雲喺海外雲業務嘅增長潛力會喺邊度？會唔會只可以用低價競爭? 所以長期虧損？

8. 而家仲話冇咗個大客，係咪真係有啲隱憂？其實通常實際情況會比講嘅差，佢講嘅係基於非產品相關嘅要求，會唔會就係因為產品原因？實際情況真係唔樂觀。如果係國內嘅，而家阿里、騰訊、華為已經三強鼎立，都唔知點樣可以突圍，搶佔更多市場。

9. 數字媒體及娛樂呢個板塊都好鬼慘，因為今季做咗成250億嘅商譽減值，我估應該係阿里影業嗰邊減值掛，因為你而家甘既市道，影業的確好難做，不過奇怪嘅係，點解係第三季先做個減值？唔係早知唔掂架咩？不過點都好，呢個板塊又係似呼無乜運行…

10. 佢嘅天貓同淘寶嘅GMV增長都係得單位數字，原因係「市場狀況放緩同埋競爭導致」，其實係咪國內市場大環境真係差，定係佢自己間公司競爭力差呢，定係both？

11. 反而佢海外嘅零售商業有14%增長，海外嘅批發商業亦有29%增長，當然規模冇中國商業咁大，但係中國商業板塊嗰邊嘅增長動力都難可以有太多增長，始終本身規模已經好大，同埋其他規模較小嘅電商都會去蠶食佢唔同板塊嘅電商領域。

12. 「預計中國商業分部的經調整EBITDA利潤率將會持續受到我們對增長業務的投入步伐以及我們直營業務增長所影響」，呢一句嘅關鍵字係「持續」，即係佢都唔知可以點解決或者冇諗住短期解決。

13. 理論上如果你係有計劃地燒錢而去做市場，你會知道/計劃返燒到幾時就會停。咁每季業績都應該update 下market 你開拓市場嘅進展。但係如果你自己都唔知幾時會achieve, 你就只能做好過預期管理，話俾人聽呢個頹廢情況係會持續，咁呢個唔係好理想喎。

14. 先係做個250億商譽減值，又話你聽咁EBITDA利潤率將會持續受壓，因為要增大業務同埋對商家嘅扶持，阿里雲又無咗個海外大客，咁就令人覺得佢嘅業務前景非常之唔確定，或者係非常之確定係差。

15.BaBa之後啲業績無論喺數字上或者文字表述，如果冇睇到一啲業務上有轉機嘅蛛絲馬跡,其實可能要繼續觀望，今年都可能未必有起色，唔通芒格真係坐咗艇？

＊文章獲Cfo講年報授權刊登，原標題為《#CFO講年報 #阿里爸爸 #業績 #爸爸頹廢之謎》

免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。