【投資專欄】股市混沌期只有Hard penny沒有Easy dollar？路飛：炒車撞斷手要識壯士斷臂（路飛投資）

整個星期都沒有出文，因為都知新經濟股跌咗好多（IT，科技，醫藥都跌穿晒上升軌，ARKK差唔多正負零），既然上次係「CT10引發嘅輪到」講到已經清倉新經濟，幸運地避咗一劫，都唔想講太多雪上加霜。但係有朋友話要跟路飛BTFD（我今日先知呢個字點解），所以都想講一講近排嘅操作。

雖然轉左去舊經濟，但係見到大市開始一日升一日跌，升嘅時候成交跌，跌嘅時候成交升，最後決定將整體持倉減到10%。有人睇唔明，有人覺得係大戶玩嘢，我估計只係人心有變：從牛年之前大家只係買升，到之後開始有人take profit，構成大波動。當人分為兩邊，升市嘅時候睇跌嘅人會停手，造成大市急升，但係冇成交配合；相反跌嘅時候，恐慌情緒令到之前買落貨嘅人放貨，所以有足夠成交量。因此尋日升700點，有人同我講大市反彈力好強，我係唔覺得嘅，一嚟市場寬度好窄，只有50% watchlist升，同埋成交量仲係好低。

其實呢個情況之前都有遇過，感覺好似2018年年初嗰一轉，我將佢稱為「混沌期」（有朋友同我講，呢樣野叫做「Hard penny」，之前嗰段時間叫做「Easy Dollar」，我覺得非常貼切）。簡單來講，混沌期對我嘅操作方法來講係一個好難賺錢嘅時間，若果你揸一個portfolio ，好容易高買低賣，跟住越輸越多，但係輸完之後大市方向未清楚。嚟緊有機會見到小反彈，彈完又可能散水。

之前有篇文講坐車撞到斷手，之後應該點做，而家正正係呢個情況，相信大家都斷咗手，我都斷咗大半隻。處理嘅方法就係留低隻手喺架車度，跟住離開，唔係宜家入返去搵返隻手嘅時間。如果而家即時想入返市，可以諗吓一年後嘅自己，會唔會寧願喺嗰個時候先投資呢？

路飛投資簡介：專業投資者，前銀行分析員（香港/上海）中港長短倉策略 (0-120%倉位) ，覆蓋約250隻股票。
Annual return ~10-20%, Max drawdown ~6%主要希望透過記錄投資的思考過程，跟其他專業投資者交流。
＊文章獲路飛投資授權刊登，文章標題受《Market Digest》更改，原標題：進入清晰嘅「混沌期」