【投資專欄】恒指不升反跌！弩飛：判斷出錯，點算？（弩飛投資）

上一篇文提到弩飛認為7/1之後有機會放寬流動性同埋出啲有利嘅消息，turn out啱啱相反：唔單止收緊流動性，仲開始出壞消息（科技股比滴滴事件影響向下突破，醫療股亦受到抗腫瘤藥徵求稿出台嘅短期負面影響）。當判斷同結果有出入，應該點做？

其實判斷出錯嘅情況間唔中都會發生，痛就一定痛，但係處理痛楚都係投資上重要嘅一環。首先，先諗返自己原先嘅部署/判斷係乜嘢，同現實情況嘅差距喺邊，定係只係市場嘅情緒反應。

以自己嘅判斷為例，我原先認為係中美股市仲係硬正嘅情況下，科技股嘅估值都叫合理，所以諗住park一部份嘅現金落去（雖然我認為醫藥比科技優勝，但係政府嘅打壓尚算合理，所以咁嘅估值值得一搏）。所以上星期五嘅跌幅，雖然跌得唔少，但係我都照忍，因為基本面冇乜變化（有讀者喺週末問我會點樣處理，我話通常呢啲情況我都會睇埋個反彈力有幾強先，反彈得弱咪放一半，反彈得強就繼續揸住）。

但係到咗星期一朝頭早，見到滴滴嘅新聞，最重要嘅部份係「企業擁有嘅數據唔可以多過國家」，我當時即刻明白上星期五嘅弱勢有可能係「春光鴨」做咗預先嘅部署，所以唯有即刻係唔等反彈嘅情況下將大部份科技股cut loss，因為「政府嘅打壓尚算合理」嘅判斷已經唔成立。

至於醫藥，抗腫瘤藥徵求稿出台嘅市場情緒比較詭異，亦都構成我放貨嘅原因。當個徵求稿啱啱出嘅時候，我係有睇一睇，見到市場冇乜反應（A股CRO係有啲反應），但係兩日之後用返同一個原因推香港嘅CRO向下，我就明白呢件事係一個催化劑令大眾一齊放貨，而唔係基本面嘅問題（呢個徴求稿其實對領先企業仲好添！），所以當日反彈左之後我都唔急住追貨，反而將精力集中係其他行業。

幸好，市面上仲有好多唔錯嘅投資機會，例如電動車、光伏、A股創業板都幫手頂到下個PnL，我亦都乘機加大左注碼。

弩飛投資（前稱：路飛投資）簡介：專業投資者，前銀行分析員（香港/上海）中港長短倉策略 (0-140%倉位) ，主要希望透過記錄投資的思考過程，跟其他專業投資者交流。
＊文章獲弩飛投資授權刊登，文章標題受《Market Digest》更改，原標題：判斷出錯，點算？