【投資專欄】 FB業績好過預期少少但元宇宙幫手蝕錢，Reels開始發力，FB全面TikTok化？（財經卒仔）

俄烏戰爭令FB由三月開始無咗俄羅斯市場，原本估Q1收入可能無乜得升，點知都升到7%，符合管理層年初增長3%至11%預期。歐洲因為俄烏戰爭唔係好得，MAU、DAU、ARPU全部都跌；北美各樣基本持平；全靠亞太同其他地區有增長，頂住收入。

收入增長雖然放緩，但為長遠著想，支出Keep住加大投放，主要用咗請人做R&D；最新headcount 7萬7千人，多咗三成。就係因為咁，Q1盈利要倒退兩成，亦係預料之內

朱仔可能見股價跌得有啲金，想盈利靚仔返啲，所以支出方面有少少讓步，由原先預期今年要洗900至950億美金，縮到870至920億美金。

【Reels開始發力】

二月開始，香港有得玩IG既短視頻Reels，我自己睇過健身、囡囡啲片，體驗都OK既。本地KOL都開始玩多左Reels，但AI特效少，數量少、主題亦單一咗啲，都係跳下舞，咪下嘴咁。話曬都仲係新野，大家都未算好熟，俾啲時間，內容應該會更豐富。

整體IG用戶用超過兩成時間睇Reels，應該仲有空間上，但由於仲係改善緊Reels既體驗，廣告非常少。換言之，分散左用戶attention去無乜廣告既Reels，變相限制收入增長。

【全面TikTok化】

你有無發覺，呢排無論係FB定IG，都多咗好多你無follow開既推薦post？成日推啲奇怪野俾我，例如：

●楊紫瓊一生無子卻在年近60綻放魅力，被法拉利總裁求婚10次癡戀15年

●趙麗穎熱巴楊冪在「星光大賞」同框，關掉十級美顏，顏值差距一目了然

我都無睇開娛樂、又無follow過呢類page，推俾我做乜鬼？

以前你所睇到既post，除咗廣告，應該全部都係你親朋好友、follow咗既fan page或群組，但其實啲post未必真係全部啱你心水。我地好多時係因為一個post覺得好睇而follow咗嗰page，未必等於嗰page所有post都啱睇。

所以，FB開始變，學TikTok咁用AI推啲佢覺得啱你睇既post。Reels都一樣，洗乜你走去follow啲KOL，只要你睇得多，machine learning就會知你喺邊個video停留得耐，有無重複睇、有無俾like、留言，有無click入去profile等等，判斷你係咪鐘意睇呢type，之後再推多啲類似既野俾你，等你睇上癮。

但有樣野FB無學到TikTok，就係將Follow同推薦分開兩個tab處理，一係睇返自己follow開既KOL，一係全部睇AI推薦；FB將兩樣野撈埋一齊放喺news feed，我自己就覺得有啲亂。至於係咪可以睇上癮，好靠AI推薦既準確度、算法等等，呢方面正正就係朱仔加大投資既領域。

【元宇宙幫手蝕錢】

黎緊5月，Meta會喺加洲開第一間Quest 2既實體店，等人可以親自試下佢地既VR產品，對推廣Quest 2有一定幫助。除咗硬件，朱仔既核心戰略始終係社交平台─ Horizon。Horizon攪咗一排，好似仲未完全開放使用，不過今年內會launch Horizon網頁版，唔使買佢舊VR頭盔都可以玩到。Horizon亦開始變現，有傳Meta會向創作者收47.5%佣金，好多人鬧爆話收得貴，但朱仔就對呢件事信心滿滿。

元宇宙呢壇野，起碼黎緊幾年仲係蝕本貨，各科網巨頭對元宇宙都有自己布局，最後會發展成點，真係無得估。我覺得，既然洗左咁多錢，點都有啲野睇下掛，不過我個估值就唔包呢個，得咗，咪當bonus囉。

＊文章獲 財經卒仔 授權刊 登，原標題為《業績好過預期少少咁 》

免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。