【專家分析】減肥藥概念着哂火?！

港股上周三（10月4日）跌到17094點今年新低後展開反彈，今朝更曾急升347點上到18012點，市場憧憬內地再出強力救市政策，不過北水今早淨入唔多，似乎逼近上方50天線附近有獲利盤計數。

大市暫時都係弱勢中嘅反彈，EJFQ系統顯示，80隻藍籌股只有16隻呈強勢綠燈，當中藥明生物（2269）昨日剛轉強勢，今早即刻急升7%。事實上，近期醫藥生科股絕對唔失禮，香港上市生物科技指數今朝更急升近5%，跟蹤該指數嘅華夏恒生生科（3069）曾升5.4%，創近個半月高兼一舉重上50天線，值得跟進。

數今年下半年最火熱嘅創新藥題材，一定要講減肥藥，好似美股嘅生物科技公司Structure Therapeutics（GPCR）9月尾公布旗下減肥藥試驗成果，採用四星期後，幫助參與者平均減輕10磅的體重，刺激股價單日爆升三成，最近GPCR又回勇，兩日升一成二。同樣於糖尿藥和減肥藥方面領先的龍頭股諾和Novo Nordisk（NVO），下半年股價亦升兩成。有分析預計至本世紀末，全球肥胖藥物產業或達到1,000億美元。

信達生物（1801）及聯邦制藥（3933）兩隻被視為於減肥藥研發最進取的藥股，近期走勢亦靚仔，今朝更分別升6%及7.2%，其中以「第四季恒綜強勢股組合」之一的聯邦制藥更搶鏡，分析員盈測趨勢持續走高。至於內地A股亦已經有「減肥藥板塊指數」，今早升幅亦達6%，概念同樣着晒火，但要小心良莠不齊。都係果句，高回報自然高風險！

MD讀者優惠 - 以$50試用信報自家研發港股分析系統: https://bit.ly/466Gasr [記得輸入優惠碼: EJFQ50]