【投資專欄】TVB發盈警，股東應佔虧損大增3.8億，真係一間士多搞掂你，定另有原因？（CFO講年報）

TVB預計2021年嘅股東應佔淨虧損由2020年2.8億，增加到2021年嘅6.4億至6.6億。即係虧損增加3.8億倒。

又係時候㗳真啲佢公告啲字眼。

佢公告講咗三個主因：

1. 於2021年8月，我們收購士多，由於士多集團仍然處於投資階段，因此其2021年財政年度出現虧損，與其業績合併引致我們的電商業務於本年度錄得淨虧損。

電子商貿板塊有淨虧損一定係事實，因為公告清楚講咗呢一點，但係影響係唔係咁大，公告冇清楚講到。個人覺得呢個未必係股東應佔虧損增加3.8億嘅主因。

因為，睇返佢收購士多時嘅公告，士多一年大概蝕8500萬， TVB係同邵氏兄弟夾埋收購士多75%股權，而TVB就只佔其中82.5%。

所以應佔股東浄虧損係要剩晒呢啲百分比先至係屬於TVB要承擔嘅虧損，其他部份係少數股東承擔。

仲有，對士多嘅收購係2021年8月先完成，所以TVB只係會計士多由8月到12月嘅損益數據落佢嘅2021年全年合併損益表。

假設士多一年大概蝕8500萬，冇乜大變，所以佢”貢獻”TVB 2021年嘅總虧損應該只係得：8500萬X82.5%X75%/12X5=2192萬左右。

仲有，收購公告都有講，其實TVB佢本身嗰個電商業務喺2020年係有5300萬分部盈利。

除非佢成個合併後嘅電商業務喺2021年有好大嘅搞作同變化，但係我覺得唔會，因為你八月先合併。

所以，就算士多令TVB蝕多2000零萬，本身電商業務應該都做得差咗好多，變成整體電商業務係虧損。所以主因應該唔係好關士多事。

2. 於2021年財政年度期間，我們繼續投放資源於內容製作及人才培育以加強本台核心創意實力，長遠而言，我們深信這些資源運用將能推動各項業務的未來增長，然而此項投資和收購士多也導致本年度的營運成本上升14%。

士多好慘，喺第二個解釋人又俾人提多一下。

其實你喺第一點講咗佢有淨虧損，淨虧損咪已經包咗個費用部份啦，呢度又去提多次士多費用，咁強調同重複做咩呢？係唔係真係咁唔鍾意間士多？

其實係唔係佢嘅內容製作人才培育呢啲本來嘅業務由於競爭太大，叫價唔可以太高，成本又減唔到，先至令到佢出現重大虧損嘅增加？

整體營運成本會唔會主要係本身不斷投入資源製作節目而上升？但又變咗兩個原因都關相對規模較細嘅士多事。

3. 2020年收到政府2億嘅補就業政府補貼，2021年冇。

呢個當然係另外一個主要原因啦，但係就算撇除呢個原因，佢虧損都增加1.8億，差唔多比2020年蝕多一倍。

＊文章獲Cfo講年報授權刊登，原標題為《#CFO講年報 #TVB #盈利警告 #一間士多攪掂你？》

免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。