【投資專欄】美團由以前有變無PE,唔知幾時燒完錢,仲要係政策監管風眼…(CFO講年報)

投資專欄
【投資專欄】美團由以前有變無PE,唔知幾時燒完錢,仲要係政策監管風眼…(CFO講年報)

投資取向其實冇話一定啱同唔啱,但係要認清風險因素,中概股而家嘅風險就係政策個不確定性同埋股價對政策高敏感度同脆弱性。

美團主要分三大業務:

1. 美團點評,即係做外賣,幫啲餐廳或者其他生活消費品搵騎手送外賣,收取商家佣金、外賣配送服務費(今季業績先開始拆呢個收入出嚟同披露),同埋線上廣告費,呢個業務會做得辛苦啲,因為經營成本高,涉及騎手實體配送同數據成本,所以經營利潤率只有6%左右,但就量大。2021年接近1000億收入,經營利潤2021年大概有60億。呢個業務最主要對手係阿里個餓了麼,不過阿里佢冇分開披露餓了麼數據,唔知餓了麼嘅情況,如果美團咁賺錢,餓了麼應該都唔差。

2. 另外一個業務大眾點評,即係酒店到店嗰啲,好似一個超級加強版嘅OpenRice,但就唔只食野嘅資訊,所有生活娛樂休閒消費嘅網上資訊都有,會收取商家佣金同埋線上廣告費,因主要係線上平台,所以邊際成本有限,經營利潤率係可以去到43%,當然佢嘅銷售收入冇美團點評咁多,2021年有約330億,但係利潤率高,2021年經營利潤有140億左右,多過美團點平外賣。

3. 最後一個業務就係叫做新業務。其實就係玩緊京東模式,線上零售電商同線下履約物流即時配送,仲要自己買貨坐貨,仲要去啲二三線地區農村地區去幫助嗰啲地區嘅發展,但係呢個業務相當燒錢,2021年Q3、Q4都分別虧損100億。阿里業績、京東業績都係講呢啲野,係吻合嘅。

4. 其實每次出業績,我都問點解佢要做呢啲吃力不討好嘅嘢,明明美團點評同大眾點評其實賺緊好多錢,以前佢都係有PE,就係呢個新業務搞到佢冇咗PE。我成日喺度諗一係就係因為京東同阿里都不斷燒錢做緊呢嘢樣,佢唔做,過幾年成個market share都冇咗,同時對佢原本業務可能都會影響,一係佢真係國家任務,共富又好,要提升二三線城市嘅零售活躍度又好,但實在太燒錢。可以肯定嘅係,呢一個動作,京東同阿里都好有決心做緊,一定係市場趨勢。但係要見到幾時有收成,應該都要兩三年後。結果係點,真係無人知。

5. 美團本身做得好叻嘅美團點評及大眾點評其實2021年係做得幾好,銷售收入同經營利潤都係有高幅度增長。

美團點評:

全年收入963億,同比增長45%;經營利潤62億,同比增長118%

諗深一層疫情對佢呢啲外賣餐飲服務其實係有利,咁如果疫情慢慢好轉,啲人多咗出嚟,反而2021年會唔會係佢餐飲外賣嘅一個高峰, 2022年會唔會回落?

大眾點評:

全年收入325億,同比增長52%;經營利潤140億,同比增長72%。

但係佢始終係喺第三個板塊持續燒緊錢:

新業務:

全年收入503億,同比增長84%;但經營虧損384億,比上年增加252%。即係做500億生意要用880億成本,悲情。

6. 佢嘅業績都有講佢哋嘅戰略係要進一步拓展知更廣泛的零售領域接觸更多的市場參與者,其實講到出口就係要同京東同阿里巴巴爭。

7. 第四季度業績,總虧損係50億,睇落比第三季度嘅100億,由大幅改善,但係拆返開嚟睇,其實佢嘅新業務兩季都係蝕100億,冇乜進步,第四季度總虧損減少係因為佢嘅本業美團點評同大眾點評做得幾好先至抵消咗。

8. 之前都有講到因為要改善騎手福利可能會令到美團嘅外賣業務成本增加但係睇落佢銷售增長強勁依個利潤率都有改善所以騎手福利改善呢個成本可能已經叫做俾佢控制到或者搵到方法解決。

9. 有一個細微變化,都值得留意,就係喺全年業績公告,美團將佢佣金收入同外賣服務收入分開披露。點解?大家有留意美團都會知道啱啱過去嘅2月, 國家發改委要求外賣服務平台降低佣金收入程度。而係最近嘅新聞黃興就話積極同監管機構保持溝通,我估佢業績披露更改都係一種溝通方法。

10. 以Q3季績作例子,喺呢個政策未出之前,Q3 整季嘅總佣金收入係296億,但係到咗Q4,或者係叫做全年業績,總佣金收入只係有141億。佣金收入唔係跌咗,係佢將以前嘅佣金收入,再拆細分做1)餐飲外賣配送服務(即係話呢啲唔關佣金事)同 2)佣金收入。

11. 佢應該就係想話俾個市場聽同埋話俾政府聽其實個佣金實際上係冇之前披露咁多,大家都誤會咗。因為其中有一部份係一啲外賣嘅技術服務費並不是佣金,呢啲真係上有政策下有對策,但係唔知政府受唔受,定係已經傾掂數?拭目以待。

12. 無論點都好,其實,呢一個正正係再次示範咗中概股受到政策打壓嘅高不確定性,唔知幾時又有新政策,同埋唔知政策嘅影響有幾大。

13. 要求減低佣金收費嘅消息一出,我記得嗰日3690 就由200幾插到落180,一日跌30幾蚊。投資取向其實冇話一定啱同唔啱,但係要認清風險因素,中概股而家嘅風險就係政策個不確定性同埋股價對政策高敏感度同脆弱性。另外,講返美團嘅本身基本面,就係佢嘅新業務都仲需要艱苦去經營多幾年先至會有曙光。呢個就係整體美團嘅狀態。

*文章獲Cfo講年報授權刊登,原標題為《#CFO講年報 #美團 #業績 #整體狀態 #國家任務定係真打市場

免責聲明:本網刊載的所有投資意見,只可作參考用途。讀者在作出投資決定前理應審慎,並主動掌握市場最新狀況。若不幸招致任何損失,概與本網無關。而本集團旗下網站或社交平台的網誌內容及觀點,僅屬筆者個人意見,與本集團立場無關。本集團旗下網站對因上述人士張貼之資訊內容所帶來之損失或損害概不負責。


即刻follow我地Facebook同Instagram,隨時接收最新資訊!

你可能感興趣