【投資專欄】港交所獨市生意一定無得輸？ 要買港交所唔係睇股價，係睇呢啲指標（CFO講年報）

港交所388過兩日（24號）就會出2021年全年業績。

1. 佢本身都有出開季度業績，所以睇佢喺10月尾出嘅第三季度業績，大概都可以預測到佢全年業績嘅情況：

2. 估計總收入同埋EBITDA都有雙位數增長，不過應該係僅僅夠雙位數。

3. 因為由2021年第一季開始，到中期，到第三季，佢嘅總收入同埋EBITDA 升幅不斷收窄：

第一季：收入升49%， EBITDA升61%

中期：：收入升24%， EBITDA升28%

第三季：收入升15%，EBITDA升17%

4. 咁全年會點？會進一步收窄，如果有雙位數增長，都係僅僅夠。而果計EBITDA ratio ，即係業務嘅efficiency,就大概係78%以下，就更加好有可能會差過上年。因為第三季都只係好過上年1%。

5. 睇港交所嘅業績，有一啲數據，你同我都好容易睇到，都會知佢個業務情況表現成點。冇錯, 就係佢嘅每日平均成交金額。如果大家有留意開，港股最近幾季其實都叫做成交金額唔高，每日千零億，市況嫲嫲，指數同埋成個港股市值都算低(2021年12月港股市值得42萬億，但2021年1月有成51萬億），咁樣其實係直接影響咗港交所嘅收入。

6. 港交所嘅業務模式非常簡單，就係提供一個證券、衍生工具同埋各類金融產品嘅一個交易平台，佢哋定交易規矩同埋提供交易服務、數據系統服務，最主要都係收交易收費，即係話你一買一賣，佢就會收commission 或者收交易後嘅結算服務費。所以成個大市，成交金額越大，佢收入越高，恆指指數越高或者港股市值越高，佢嘅收入都會越高。

7. 至於佢嘅成本最主要係維持市場秩序嘅一啲電子化系統費用，同埋好professionals 嘅人工，例如律師、會計師、高管嘅人工，同埋一啲維持交易平台嘅維護費用，相對收入嘅波動性（好似恆指嘅波動性），佢成本嘅波動性係相對穩定。所以簡單啲嚟講只要成交金額大升，388就會大賺，相反成交金額一潭死水，每日千零億，佢嘅margin 就會下降。

8. 成交金額其實我哋每個月都可以上港交所嘅官網睇返。俾啲例子2021年1月每日平均成交金額係2457億，嗰時我諗大部份人都好happy, 因為個大市暢旺，港交所當然都好happy, 因為2021年1月原來已經係全年平均成交金額最高嘅一個月。

9. 累積到2021年1-6月，每日平均成交金額係1882億，直到2021年12月，每日累計平均成交金額跌到1667億，其實呢個trend,佢同恒指係差唔多地一直向下插，即係代表佢2021年虎頭蛇尾。無錯，2021年全年業績一定會好過2020年全年，只因為2021年嘅第一季表現非常強勁，但之後漸漸無以為繼，再望返前景即係2022年會咩環境？

10. 其實大家都感受到或者睇到個恆指都係停滯不前，成交金額都係唔多，再望埋2022年嘅一月嘅成交金額得1286億，嘩！低過2021年1月嘅2457億，差唔多50%， 仲要低過2020年1月嘅1295億。咁你就知點解今日52週新低。

11. 所以佢官網show佢2022年1月嘅平均成交金額，比較嘅數字唔係2021年1月嘅同比數，因為實在爭太遠太樣衰，佢只能比較上一個月即係2021年嘅12月1178億嘅環比數。但以前每個月不嬲都係比較上年同期的

12. 其實成個港交所嘅Business Model，係要不斷增加成交量同成交金額，咁佢嘅業務先會有增長。增加成交量就係管理層不斷設計一啲新產品一啲新嘅指數基金呀深港通、滬港通啊，或者係吸引多啲大隻公司、中概股回歸港交所上市。

13. 但係最關鍵嘅都係成交金額，你設計好多新產品叫多啲大隻公司嚟上市，但係你個資金池唔夠大，即係話好似貨幣供應咁，永遠留喺港交所嘅資金得咁多，你有新產品都只係將舊產品嘅資金轉去新上市嘅公司、新產品度，但係整體市值未必會有上升動力，指數未必會有上升嘅動力，咁樣港交所收入同利潤其實增長唔會太高

14. 其實由睇返上年嘅恆指情況，加埋一啲國際形勢、科技股被打壓，我記得年初都講過，其實港股或者係啲大型科技股啲估值重估，其中一個原因係有啲錢可能走咗就唔返嚟，咁樣嘅話，有限嘅資金池去產生成交同埋成交額增長一定差過以前。

15. 雖然港交所喺香港係獨市生意，但係喺資金自由流動嘅年代，其實佢面對着好多競爭，我唔一定去買港股，所以形成而家港股、恆指長期時升時跌，變咗唔係一個慢慢增長嘅企業而係好季節性、波動性，恆指高，股市好，港交所就生意好，恆指跌返，佢生意又差番。

16. 展望嚟緊2022年，只能寄望大市回穩，吸引新嘅資金返嚟。如果可以。所以投資港交所一定係望住佢每月平均成交額，港股總市值同埋指數嘅狀況，見到有回穩同埋有上升動力先好考慮。

傳送門：每月嘅日平均成交金額：

 https://www.hkex.com.hk/.../HKEX-Monthly-Market...

＊文章獲Cfo講年報授權刊登，原標題為《#CFO講年報 #港交所 #業績前瞻 #前景會係點》

免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。