【投資專欄】揭示中國整頓各大企業的真正原因：中國其實係真心想「公平」？（富L/窮S戒窮進化筆記）
以下文章獲Blogger「富L/窮S戒窮進化筆記」授權轉載，不代表Market Digest的平台立場。
大家依個星期實係輸到麻木，心諗中國係咪癲左？搞完未呀？係咪諗唔明點解中國要整頓各大企業呢？反壟斷只係怕巨頭企業會動搖國家政權？睇完依篇你就明今鋪係時代轉捩點了，以往投資邏輯已經唔岩用～ ATM已經不是以前的ATM了，唔再可以一味覺得企業係優質而SH，忽略左宏觀政治及經濟的影響 ，大家投資必需要與政經context同步呢～
首先回顧下大陸由2019年12月起至今短短半年間搞過d咩？
「房住不炒」、「螞蟻上市失敗」、「社區團購九不得」、「內房三條紅線」、「深圳二手房指導機制」、「上海高中招生改革，形同廢除學區房」、「螞蟻集團宣布徹底整改」，「滴滴被審查要下架」、「鬥魚、虎牙終止合併」、「騰訊要解除網絡音樂獨家版權」「雙減政策落地，校外培訓行業遭滅頂」…
四個字總結「屍橫遍野」，我哋講緊大家個倉呀陰公
～～～～～～～～～～～～～～～～～
以上嘅事件加起黎大家除左感受到中國非常明確嘅反壟斷訊號之外，仲會聯想到乜？
就係中國發展思路有重大轉變，從過去偏重效率，轉向「注重公平」。
「大國掘起」的必經階段係由基層出生嘅窮L咁，一開始無錢無人脈，需要透過勞動力賺錢，然後儲蓄累積第一桶金，跟住去創業，賺到錢就再投資擴張開分店，形成連鎖集團。
一個國家嘅發展可以總結以下三個階段：
1. 原始積累階段
2. 野蠻生長階段
3. 內部發展再平衡階段
舉個西方資本主義例子
英國：
英國係原始積累階段透過強大海軍展開戰爭，獲取殖民地以及戰爭賠償。
野蠻生長階段，英國販賣自身產品到殖民地賺取商品價差，有錢搞科技升級，提高生産效率以及科技水平，形成正向循環。國家生産力水平迅速提高嘅同時，資本積累快速上升。一般呢個時期資本家賺爆錢，但係老百姓普遍窮困，夠維持生活但儲唔到錢，貧富差距非常巨大！
平民百姓日子過得唔好，自然會嬲豬，表達對政府不滿，矛盾若果不能解決，原有統治就會走向衰落，甚至引起暴力革命，所以必須再平衡從而走出新道路。
係依個「內部發展再平衡」階段，資本主義國家會透過吸納基層進入政府，迫使資本家讓利，令工人加人工，改善基層生活狀況，改善社會貧富不均狀況，公平分配財富資源到每個人手上。
～～～～～～～～～～～～～
咱們來看中國
從以上英國例子可見，歷朝歷代經濟發展伴隨最大問題，就係社會貧富分化程度不斷擴大，而且一旦開始就不可逆，最終影響穩定甚至社會制度崩潰。
英國資本主義都要管資本平衡啦，更何況係中國係社會主義國家，更加要將「再平衡階段」嘅公平原則執行到底啦！
新中國成立短短幾十年，戰爭結束重新發展，係原始累積第一階段，透過全國勒緊褲頭帶完成累積，完善重工業。
之後搞改革開放，融入全球經濟體系，開啟第二階段野蠻生長。中國作為社會主義國家，發展原則除左追求效率之外，亦要兼顧公平，保障老伯姓嘅民生。改革開放初期提出「讓一部分人先富起來」，目的係做大經濟蛋糕令老伯姓脫貧，所以呢個階段資源會集中係企業家手上，比佢地發揮自己嘅優勢，中國過去幾十年經濟高速增長就係改革開放帶黎嘅成果。
雖然經濟係飛左上天，好多人暴富，但係亦帶來環境污染同埋社會貧富分化嚴重問題。而2008年美國次按危機後瘋狂印鈔帶來嘅資產膨漲，相信大家都感同身受，父幹比苦幹更重要，只打西工買到樓係要十幾年唔飲唔食。
所以咁撕裂同污染落去係不利統治的呢！
重點黎啦！
推出一系列「反壟斷」國策非常強烈且明確表示，中國想透過行政手段進行資源重新分配，通過調節收入分配制度，所有國民共享國家發展紅利，所以呢兩年睇到國家提升工業生産環保要求、大搞碳中和、對互聯網平台進行反壟斷、壓制房地産行業過度利用槓杆發展。
民生相關行業受到史無前例嚴格監督，一開頭我地回顧的反壟斷國策背後目的其實係以下都係想咁樣：-
民間貸款唔能夠被金融科技巨企綁架，透過金融手段預支國民未來收入，利用槓桿賺取巨額利潤。
互聯網平台發展社區團購業務，不得用低於成本價傾銷商品，透過燒錢自損提高巿場份額，擠壓小商戶生存空間，目的就係民生用品嘅定價權唔可以落入巨企手上。
內房三條紅線就係要控制房地產過度槓桿問題，推出二手房指導房價機制嚴格控制房價；上海學額改革，優質高中學額按比例分配到每個區、每個初中，等同消滅學區房；校外培訓機構被滅頂，優質教育人才及資源保留係國家教育體系。
再平衡提高基層收入，與此同時能夠擴大消費巿場，同時消費產品不斷升級，替代進口產品，形成內循環巿場。經濟想要更高質量發展，就需要産業升級，產生更多高質量就業職位。
我地宜家站係重要時代轉折點，國民生活、產業發展以及投資方向都會出現巨大改變，過去嘅投資經驗亦唔適用。
相信隨之而來針對醫療、教育、住房、生育政策只會越來越多，而碳中和、新能源相關主題會係國家發展佔據重中之重嘅位置，除左符合全球發展大勢，更重要係與西方國家有共同政治語言，而相關產業又能夠展示國力，光伏行業＋新能源車產業鏈中國都係全球最大，依兩個行業相信能夠出現具國際級影響力嘅企業。(隆基+寧德時代吧)
～～～～～～～～～～～～～～～～～～
富L/窮S的想法
2021年7月14日契媽Cathie Wood警告中概股估值將會重置。當初我地都無諗過背後有咩含意，以為契媽係咪睇唔明中概股，暴跌證明左我地想法太傻太天真
國內大型企業美好時光到頭，原有業務天花板被設限制於低位，涉及民生息息相關業務受到政府嚴厲監管，由原來以追逐盈利講求效率，變成類似提供水電煤嘅形式向社會提供基本民生服務，由增長股轉為價值股，如果現存巨頭搵唔到適合嘅新增長曲線，甚至會降維做公用股。
當然互聯網平台企業依然優質，而且護城河非常深，捱過依波大調整之後，相信好有可能重返高位(頭盔MODE)，但係新國策方向黎睇，至少係一年內，互聯網平台都係逆風板塊，可能發生估值區間下移。
一直以來靠燒錢
刷流量形成壟斷再割韮菜賺錢嘅發展模式將會一去不返，社區團購大戰好可能係互聯網巨頭最後一場大型流量戰爭，係強監管制度下，戰爭有無嬴家係一個巨大黑人問號。
著名金牌分析師，外號「小金人」蔡金強亦係最新訪問片段講到ATM已是「昨日黃花」，富L/窮S亦表示想法一致，十分認同。
投入「硬科技」？
「硬科技」即係d好高技術門檻，可以引領新一輪科技革命和產業變革的技術，例如光電芯片、人工智能、航空航天、生物技術、信息技術、新材料、新能源、智能製造等。
轉向投入「硬科技」雖然係符合國策，但係對任何一位普通投資人黎講係非常困難，由於硬科技嘅知識門檻非常高，與熟悉嘅TO C賽道並唔係同一個級別。
傳統價值投資思維唔適合投資具有高風險+高偶然性嘅前沿科技，學習VC思維先可能駕馭，因為需要專業知識，對技術有前瞻性判斷，對硬科技相關產業有透徹理解，財務數據對相關公司嘅指導意義不大，因為一個新技術路線出黎就可以取代現有技術路線，總括黎講最適合散戶嘅投資工具係產業型ETF。
目前HK上巿相關產業ETF就有Global X 中國潔淨能源 ETF (2809.hk)、Global X 中國電動車及電池 ETF (2845.hk)、Global X 中國機械人及人工智能ETF (2807.hk)、Global X 中國半導體ETF (3191.hk)。[發誓無收廣告費架]
我地嘅持倉第一步將會逐漸移向產業型ETF，至於個股分析就真係得閒先會詳細研究再發佈啦，初步想法會先研究下韋爾股份(603501.SH)以及埃斯頓(002747.SZ)。[留意返大部分產業相關公司都放係A股，散戶要做南水北向尋寶]
最後附上恒生科技指數以及產業型ETF對比圖。
虎哥趨勢投資好早已經提出要轉倉去呢幾隻ETF，真心佩服。
弩飛投資較早前講 到政府向DIDI出拳有如中國主動打金融戰，SEC亦係WEEKEND傳出暫停處理中概股IPO，極度有SENSE。
＊文章獲 富L/窮S戒窮進化筆記 授權刊登，原標題為《必讀！投資邏輯重大轉向》
免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。
