【投資專欄】又搞音樂、又搞教育、又搞網站，網易百足咁多爪但食糊的業務只靠呢樣？（CFO講年報）

網易俾我嘅第一印象就只係佢嘅163.com電郵，原來有成10億註冊用戶。以前幫國內公司做IPO, 我見過最多國內人用嘅電郵server 都係 “qq” 同埋”163.com”。 雖然呢10億註冊用戶唔可以直接變現做收入，但係其實佢各項主要業務嘅潛在增長，都可以透過呢個龐大嘅註冊用戶，作一個大數據分析同埋精準引流。

1. 網易本身起家係一個門戶網站，好似百度咁，係一個傳媒互聯網媒體平台，有網易新聞、 163.com等。不過，佢最勁嘅其實係手遊，係iOS同埋Google play嘅下載統計，呢幾年、2021年全球排名第二，僅次於騰訊。佢亦都係動視暴雪喺中國市場嘅代理商，漫威都有同佢合作開發遊戲。

2. 另外，佢有一個線上教學自學平台，叫做有道，活耀用戶都超過1億，仲有個叫嚴選嘅電商平台，搵人生產但係貼自有品牌，要有坐貨風險，好似京東模式。仲有一個業務叫雲音樂，2021年低喺港交所分拆上市，網易而家仲揸住58左右%股份。

3. 其實網易整體業務好穩定，增長可觀。2021年第4 季總收入同比增長23.3%， 達到人民幣244億元，主打業務一定係遊戲服務，佔總收入超過70%；網上教學自學平台「有道」，收入13億同比增長20.5%；雲音樂收入19億同比增長23.9%；仲有其他創新業務（主要廣告、媒體、電商業務等）都有38億收入，同比增長0.6%。

4. 呢個pattern，雖然佢將有道同雲音樂單獨拆出嚟披露，但係其實都唔係貢獻好大，反而其他業務裏面啲廣告業務啊電商業務對整體收入貢獻重大。我估唔將呢啲業務單獨拆出嚟披露，係因為本身呢啲業務啲利潤底數數唔係好靚仔，增長唔穩定，拆出嚟都冇賣點。

5. 網易2021年第四季度個經營效率其實做得幾好，佢總收入增長係23%，但係毛利增長係30%，呢個代表緊佢喺控制成本方面做得好好，唔係一般科技股只用燒錢呢招嚟玩生意增長，毛利率因為咁而亦都由上年同期嘅52%增加到今年嘅53%。純利率有19%，2021年全年賺170億， 升37%。其中遊戲業務好好賺，毛利率有64%同上年同期持平，其實成間網易就係靠遊戲強勁表現撐住全場。

6. 關於有道呢個網上教學平台，其喺美國都有上市，代號叫DAO。係毛利率高,有50%以上，不過其實整體仲係蝕緊錢，網易嘅第四季業績都有講：「有道實現咗一個持續嘅經營正向現金流」，憑呢句你就會知道有道嘅狀態係叫做喺現金流上開始持續出現正向，但係成個業務仲係loss making。

7. 因為搞呢啲線上學習平台需要投入好多資本，要佢嘅註冊用戶人數不斷攀升，而佢將來嘅marginal cost 又要控制得好，先至可以擴闊利潤率，實現最終純利。而家其實都係有網易嘅大佬手遊業務頂住先，去撐住佢呢個蝕錢嘅板塊。不過叫做已經獨立上市，融資平台同渠道對9999都冇咁大壓力。

8. 至於網易雲音樂，佢喺2021年12月香港聯交所分拆上咗市（9899），狀態比有道仲差，毛利率係啱啱變正數嘅4%，同埋蝕錢仲多過有道，招股書披露，2021年上半年唔計啲可換股優先股嘅公允價值損失，半年佢都蝕緊7億，（有道2021年全年蝕9億）。

9. 雲音樂嘅業務模式係採取受訂閱會員嘅費用同埋線上售賣一啲虛擬物品同埋廣告服務。佢要透過不斷由訂閱會員 （2021年6月有1.84億人），轉化成為付費會員（2021年6月係有2600萬人）先至可以變現。

10. 其實你見佢2021年先叫做啱啱有4%正毛利同毛利率，就知短期內都係仲要燒啲錢，又係要靠手遊頂住。不過，雲音樂最令人擔心嘅係佢嘅活躍用戶人數2021年比較2020年只係增加1%。其實暫時無盈利都唔緊要，因為都要時間，要燒錢去搶market share, 但你係咁蝕錢，活躍用戶人數上升動力又唔係活耀，就唔無哂賣點。

11. 網易啲數另外一個俾我印象最深刻嘅係佢每季嘅profit or loss都好受人民幣同美元或者歐元嘅匯率波動影響。好似佢個effective tax rate ，上年第四季竟然有37%，即係話稅前純利賺100蚊，要交37蚊稅，當然呢個好大機會係有啲費用，唔扣得稅或者喺嗰個period 仲未扣得。check 番佢個損益明細， 好大機會係因為上年第四季佢有18億匯兌損失， 如果呢啲匯兌損失唔係trade nature 嘅，就未必扣得稅住。

12. 又例如佢今年全年稅前純利有210億，比起2020年嘅稅前純利 150億增加60億，增長40%。但係其中一個好大嘅部份係佢2021年嘅匯兌損失減少左，由2020年嘅31億減少咗26億到5億，但呢個唔係好關佢經營嘅事。即係話佢實質2021年全年純利只係增加34億或者係16.8%。

13. 匯率波動影響其實係會影響埋佢派息嘅金額嘅穩定性。因為佢業績講咗每季派息都係跟每季稅後純利嘅20%至30%去計派息金額。所以你會見到佢季季每股派息銀碼都好唔同，並唔係一定穩步上揚。現價yield得1.3左右%

14. 點解佢成日有咁大匯兌損失？原來佢上年年報都有披露。因為佢有好多現金同埋定期存款都係美元嚟嘅：90億嘅流動現金有44億係美元，700億定期存款，有558億係美元。

15. 我起初以為佢業務上可能需要中美兩邊走，所以都同時間keep住啲美元同人民幣，但佢年報係話自己主要收入同埋費用都係人民幣計價嘅，咁樣佢keep住咁多美元係咪真係好唔放心人民幣嘅貨幣安全？定係因為想食正美國加息條水，所以可以增加利息收入呢？但係匯兌損失每季升升跌跌，對佢損益都會好大影響， 值得留意。

＊文章獲Cfo講年報授權刊登，原標題為《#CFO講年報 #網易 #業績分析 #9999 #手遊二哥》

免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。