【投資專欄】你要Call吉利的4大原因：國策市難玩？你覺得啫⋯⋯（玩輪猿）

各位讀者大家好，今次係我第一次喺Market Digest出文，我而家每個禮拜都會精選一隻好有潛力嘅窩輪／期權，同大家分享。作為同大家嘅見面禮，我會想推介一隻吉利Call比大家。

最近監管大招盡出，令到個市好Chok，嚇到好多股民唔敢再掂「軟科技」。不過，就愈來愈多股民轉投「硬科技」，而輪場成交亦開始暢旺，大市總成交額1614億，輪證成交額188億，佔大市成交11.6%，較過去一個禮拜嘅8.2%為高。其中，吉利Call嘅認購總額整體排行第七，一共有1.76億掃吉利Call。好多人睇唔透個市，但點解我就夠膽持有吉利Call？

1）北水持續流入吉利
市場資金出走軟科技，總要泊向其他目標。有咩指標可以流意資金流動向？北水已經連續五日流入吉利股票，昨日（8月3日）更加有10.4億港元北水掃入吉利，登上北水流入榜榜首。值得留意嘅係，北水成交影響吉利甚大，佔港股成交27.9%，所以要睇吉利，記得睇實北水動向。

2）吉利監管風險有限，基本面向好
吉利面對嘅監管風險有限，較難受到《反壟斷法》所波及。而且公司而家向電動車轉型，對中國長遠嘅環保目標有貢獻，係政策受惠股。而吉利亦都推出緊單價較高嘅新車款。吉利已自首季逐步退出低端車款Vision嘅轎車，並在次季顯著減產Vision SUV，另一方面增加咗新款、價位較高嘅車型，相信將帶動整體平均銷售單價提升，並緩解利潤方面壓力。

3）吉利近日大力發展電池
吉利近日（7月28日）宣佈成立合資公司，去生產及銷售混合動力電池電芯、電池模組及電池包。具體嚟講，主要包括鋰離子電池、鋰聚合物電池、動力電池、儲能電池等等。吉利稱，成立合資公司將確保集團在未來獲得穩定的電動車電池供應。雖然吉利舊年新能源汽車銷量得6.8萬部，佔整體銷量比重僅5.2%，但電池業務嘅發展，見到吉利發展新能源車嘅決心，呢方面想像空間好大。

4）吉利近日積極提升電動車技術
今日消息（8月4日），吉利將在目前處於開發階段的純電動汽車（EV）的核心系統中採用羅姆生產的新一代半導體，預計吉利汽車在明年所推出的電動車，就會使用羅姆新推出效能更好的碳化矽功率半導體。碳化矽可以大幅提升效能，如果運用在電動車的核心系統中，就能讓行駛里程變長、或讓電池尺寸變小。

＊＊＊值得留意的吉利Call輪＊＊＊
產品編號：16398（摩利吉利Call）
行使價：32.38元
實際槓桿：4.8倍
到期日：2021年12月20日

利益申報：本人持有吉利Call輪13119
撰文：玩輪猿（資深衍生工具達人）

＊文章獲玩輪猿授權刊登，原標題為《點解我持有吉利Call？北水排行榜第一，又有電車轉型概念》

免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。