【投資專欄】今轉買咩股票？路飛：直接講買乜股冇意思，所以講成個思考過程（路飛投資）

由於大環境轉變咗好多，成個投資邏輯都好complex，直接講買乜嘢股票好似冇乜意思，因為係end product，所以想講返成個思考過程：

1）由於而家係業績公布期，其實存在好多不確定性，例如京東（9618）業績好過預期，佢可以跌；拼多多（PDD）嘅活躍買家打贏左阿里巴巴，但係黃崢要step down，反而阿里巴巴升（competition重要過regulation)；大家都賭微盟（2013）業績會好，業績前偷步買入，今日跌晒眼鏡。所以今轉我反而買多咗ETF打咗個base（例如3033，3147，7288，3188）

2）CT10上升，大家好辛苦喺度諗科技股跌夠未，反映晒喺股價未，其實與其諗呢啲問題，最直接係買CT10上升受惠股，例如銀行，喺長債同短債嘅gap不停擴闊嘅情況下，銀行嘅經營環境即時改善，你睇吓BOA破晒頂就知咩事，近排最鍾意中銀香港（2388）（話時話，渣打係咪做緊VCP？)

3）如果點都想買新經濟，最好搵啲有盈利/cash flow，確定性高嘅公司，因為對於DCF，如果你間公司個估值一大部份都係由未來嘅cash flow discount返嚟，CT10對你嘅影響係特別大。例如買創新藥，就買番啲已經commercialize嗰啲，唔好剩係得pipeline，仲係燒緊錢嘅business，估值嘅衝擊特別大。

4）大好過細：呢排成交量少咗咁多，大家都採取觀望嘅態度，大家都等緊個市走一邊先出手，通常第一轉資金都會去龍頭，等龍頭企穩左先放一部份去二三線，所以within同一個行業裏面，今次只係揀最大嗰一兩間。

路飛投資簡介：專業投資者，前銀行分析員（香港/上海）中港長短倉策略 (0-120%倉位) ，覆蓋約250隻股票。
Annual return ~10-20%, Max drawdown ~6%主要希望透過記錄投資的思考過程，跟其他專業投資者交流。
＊文章獲路飛投資授權刊登，文章標題受《Market Digest》更改，原標題：今轉買咩股票