【投資專欄】一文拆解「價值投資」的糖衣陷阱：各位價值投資的信徒，你個價值點計？計到2046年？（馬達投資）

馬達一向都以價值投資出發去分析一隻股票，亦係所謂「由下至上」（bottom-up approach）去睇一隻股票。 先從分析企業的護城河入手，再睇業績，損益表（profit and loss account) 以及資產負債表（balance sheet)。 有初步概念後，再以市場衡量指標去做估值，例如最大路既 PE (Price to Earnings) 、以及 PB (Price to book value) ，甚或如之前馬達提及過，以行業獨有指標去睇估值，例如內險股會用上 PEV (Price to Enterprise Value )、內房股睇 2-year forward PE 等。

2020 年尾至 2021 年頭科技股大升市，新估值更加日新月異、五花八門，冇盈利但有銷售額的，就用上 PS (Price to Sales) ；銷售額都跟不上的，就用到 Price to MAU (銷售額相對每月活躍會員人數）； 冇盈利、又冇銷售、又冇會員的，就參考在 Private Fund 融資的估值，例如當時中概股的「自動駕駛」估值，就對標外國同行既融資估值。

馬達並不抗拒用以上估值方法，始終新興行業在估值爆發前，大家都未遇過，及後市值節節上升，投行界要去「分析」時，就要用上新估值方法，是順其自然的演變。 當然，馬達認為如果基於新興估值去買股票時，不可太過離地，要以常人（layman) 角度去睇一件事。 例如馬達睇過不少投行分析報告，以現金流折現模型（discounted cash flow model) 為底，一直將公司的現金流估足 5 年到 2025 年，再以 2025 年的估值作為最終估值（terminal value) 折現到今日。 整個過程，只要有一兩個重要假設（assumptions) 有偏差，估值就會差天共地，因為時間會將假設放大。例如將銷售增長率由 25% 改做 20%，5 年的複式增長就會相差 52%，估值就會相差更大，因為銷售對盈利係帶有槓桿性的。但要問自己既係，對於未來 5 年增長是 25% 或 20%，有人能準確預計嗎？ 以此為估值基礎，真係「估估下」。

馬達是價值投資的信奉者。所以更加要小心，理解所謂「價值投資」，很多糖衣陷阱都是用呢四個字所包裝的。

＊文章獲馬達投資授權刊登

免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。