【金手指】詹培忠接受傳媒訪問，親評「佳寧案」（上）

​​上世紀70至80年代轟動一時的「佳寧案」被改編成電影《金手指》，戲中御用莊家的原型​​，曾任16年立法會議員、並被稱為「潮州怒漢」的詹培忠，正是佳寧集團借殼上市背後的主要推手，因此被譽為「金牌莊家」。

欲知當年事發經過，由詹培忠解答肯定當之無愧！《金手指》上映至今近一個月，詹培忠現身接受傳媒訪問，以下為其中訪問撮要。

1. 與陳松青初次見面？

詹：「當時我已經從事股票，我係經紀，故此佢洽談收購美漢之時，佢收購之後就有機會接觸到我，所以喺當其時九龍河內道口，當時嘅京銀行大廈13樓，佢有個寫字樓，我地就初次接觸，不知不覺就成為咗佢股票經紀，而係股票交易俾意見，同埋協助佢交易。」

2. 有參與收購美漢？

詹：「個陣時，我已經喺寶光（實業）嘅機構，由於寶光就係佳寧嘅母公司，寶光就係黃子明家族、黃創保家族佢哋擁有嘅，我哋全部...都係寶光嘅經紀同關係，兼且70年代我就協助黃家管理精工足球隊，同後來嘅寶路華足球隊。」

詹：「我係寶光方面嘅，所以我就幫黃創保交換意見，直至佢哋正式交易後，我先過去佳寧嗰邊，所以當其時佳寧集團收購美漢，就唔係我做成嘅，我係協助寶光姐。」

3. 因美色而加入佳寧？

詹：「業界都知...呢個世界男女之間嘅任何關係，其實就好正常嘅，幾十年前呢，我曾經公開講過，十個男人九個咸濕...所以套戲個主角係因為美色去接近陳松青嘅助理，呢個就絕對不是事實...無錯，鄔開莉...佳寧個名就係佢嘅，但係我從來呢，好多佳寧嘅朋友仲在生，我哋從來無講過任何說話。」

詹：「佢（鄔）係幫陳松青先生...鄔開莉啱啱係浸會大學畢業，就係佢度做，佢哋之間有咩呢，真係唔知。因為我哋經紀嗰陣淨係做生意咋嘛。」

4. 你覺得鄔開莉靚唔靚？

詹：「你問我呢，我就唔覺得好靚，因為佢肥妹嚟...好不幸，十幾廿年前過咗身。」

5. 最後一次與陳松青見面？

詹：「我估8年前啦，因為事成之後呢，我同佢仍然經常性有往來，無生意，但就兩個月度啦，佢請我食一次飯，我請佢飲一次茶...佢後來呢，由於同林秀峰嘅官司，法庭判佢要退返哂古董俾林秀峰，大約值1.1億度啦，另外要俾1000萬罰款，佢嬲起身嚟就唔俾，宣布破產。」

資料來源：https://www.youtube.com/watch?v=Xu8YTidGFXk