【投資專欄】醫藥股大跌後反彈明顯 v.s. 科技股一沉百踩，弩飛透過基本面分析原因為何！（弩飛投資）

自從上一次新經濟被殺估值之後，唔同行業嘅走勢相當唔同，尤其係醫藥相對資訊科技，調整完嘅醫藥再次重拾升浪，而資訊科技一直喺低位徘徊，甚至跌破。從技術面嚟睇，透過上次講嘅「反彈力」，仲有「趨勢樣板指數」同埋「相對強弱指數」，兩個行業嘅分道揚鑣非常清晰，但今次想從基本面講吓兩者嘅分別。

雖然喺2020年嘅大升浪入面，醫藥同埋資訊科技都係拉動新經濟中扮演重要角色，但激情過後回復理性，會發現兩個行業嘅基本面大有不同，而醫藥行業係「水退之後，見到着住鯊魚戰衣嘅巴菲特」嘅情況。

首先，資訊科技已經過咗最容易獲取新網絡用家嘅時代（印象好似係2017年見頂），由於大部份人都已經有智能電話，網絡用家紅利已經見頂，獲取新用家嘅成本越來越高，所以龍頭公司都要開始互相爭對方嘅地盤，搞到七國咁亂：

1）阿里爸爸（9988）已經俾京東（9618）同拼多多（PDD）爭緊電子商貿

2）電子商貿平台收費越嚟越貴，導致做SaaS嘅有贊（8083）同微盟（2013）嘅崛起，但係螳螂捕蟬、黃雀在後，快手（1024）同抖音嘅新商業模式影響咗SaaS嘅增長能力

3）快手（1024）同抖音係最近從騰訊（700）身上攞咗唔少網絡使用時間，但係佢哋又未monetarize到

4）遊戲平台嘅分成偏貴（～30-50%），導致近排心動（2400）TapTap嘅崛起，用較低嘅平台分成費用（～5%）令優質嘅遊戲有機會用「先TapTap，再買量，後聯運」嘅做法

其實仲有好多例子，但係我主要想表達係塊餅增長得唔夠快，導致大家要喺餅入邊互相爭鬥，資訊科技生意越嚟越難做。仲要越來越多創辦人一個接一個退下火線：從阿里巴巴嘅馬雲開始，到近排美團嘅王慧文、拼多多嘅黃崢、字節跳動嘅張一鳴，maybe something is going on? 同埋疫症導致經濟受創，今次需要讓利捱義氣嘅應該唔會再係銀行掛？

其實龍頭公司都見到呢個問題，所以阿里巴巴同騰訊先決定重新上路，加大嚟緊嘅投資額：阿里巴巴將盈利掉翻晒落去投資，騰訊都會喺企業服務、遊戲同埋短視頻燒錢。

相反，醫藥個餅仲有好多增長空間⋯ (有啲攰，聽日先寫）

資訊科技個餅相對醫藥增長得唔夠快（下集）

本來諗住偷懶，側側膊唔多覺唔寫埋後面嘅醫藥板塊，結果尋晚有讀者同我分享佢對醫療板塊嘅睇法，又鼓勵我繼續寫，咁就寫多少少啦！

其實醫藥基本面嘅嘢，都不外乎1）醫藥係10年最多10倍股的行業，2）人口老年化 + 收入增加 -> 更多錢用落改善自己健康，3）雖然政府唔希望企業賺到盡，透過帶量採購令普通老百姓有藥食，但係有質素嘅創新藥/醫療儀器，可以賣去外國（好多龍頭都做到）。簡單來講，就係個餅仲增長緊，而長線資金仍然繼續部署：

就以金斯瑞（1548）為例，佢嘅非全資附屬公司傳奇生物嘅CAR-T做得唔錯，但係相比起單抗、ADC、雙抗，佢應該有排都未commercialize到，所以如果要買都等多幾年先啦（利申：$10覺得risk return幾靚，入咗貨之後$15就走咗，因為未有conviction)，結果近排高瓴已經入股⋯ 本來諗住跟蹤多一段時間先真正出手，結果就算我想等吓，較長線思維嘅資金都唔等啦⋯

近排同醫生朋友食飯，我同佢講你知唔知有一隻海吉亞（6078），做三四線城市嘅放射治療中心同埋起醫院，好符合國情，你有冇諗法？佢話原來有唔少內地人落嚟香港醫癌症，佢睇返國內嘅癌症治療記錄，發現佢哋用真係好outdated嘅方法：例如醫鼻咽癌，香港至少都有個3D scan，但佢哋仲係用緊2D（香港已經冇人用，因為完全唔得），治療效果差太多，有太多進步嘅空間。所以其實喺講到PD-1、HER2，ADC之前，相比起資訊科技已經一人一部手機，醫療行業嘅基本治療方案其實已經好多增長空間。

利申：金斯瑞（1548）同埋海吉亞（6078）都係起飛前曾經擁有⋯

弩飛投資（前稱：路飛投資）簡介：專業投資者，前銀行分析員（香港/上海）中港長短倉策略 (0-140%倉位) ，主要希望透過記錄投資的思考過程，跟其他專業投資者交流。
＊文章獲弩飛投資授權刊登，文章標題受《Market Digest》更改，原標題：資訊科技個餅相對醫藥增長得唔夠快

本網專欄作家弩飛最近出版第一本著作《發掘超強港股》。作者經多番研究及引證，將暢銷財經書《超級績效》的SEPA®系統及VCP策略數據化，並因應香港股巿的獨特情況作長中短線調整，從而發掘有高度成長潛力的超強港股。