【投資專欄】彈弓,佢哋壓緊彈弓!弩飛:大市有機會短期見底,做個五窮六絕七翻身(弩飛投資)

投資專欄
弩飛-大市有機會短期見底-做個五窮六絕七翻身

對於中國股票市場,其實最受盈利預期同流動性影響,由於中國係打守勢,所以盈利預期變化唔會太大,都係按部就班咁復甦;至於流動性,有投行量化流動性同指數嘅關係,發現流動性通常比指數行快兩至三個星期(即係流動性見頂之後,兩三個星期就指數見頂,見底都係)。

嚟緊7月1日,係中國共產黨成立100周年嘅紀念日,咁大件事,理論上政府唔會係咁重要嘅時間比個市大跌,因此我推斷可以增加流動性去支持股市。睇返央行嘅數據,由上個星期18日開始,人行做咗8000億嘅逆回購操作,已相當全面降準0.5個百分點,指數見底嘅時間啱啱好!

所以弩飛推斷之前透過收緊流動性同埋唔特別谷經濟,大市喺度壓「彈弓」,隨着流動性返嚟,同埋內地政府有機會出利好消息,大市有機會短期見底,做個五窮六絕七翻身!

部署方面,之前一直都係揸住醫藥同埋A股,雖然本來諗住做hit and run,發現都唔使run,揸揸吓hold到而家,呢部份佔咗四成倉。而上一篇文開始提到,開始入咗ATM,因為估值開始合理,同埋有機會係帶動嚟緊大市上升嘅馬車。此外,成個六月份入咗三注雙倍指數ETF(7288,7226),跌緊落嚟嘅時候,捱價捱得不太爽,但係都頂得住,尋日入埋最後一注。為咗加大科技嘅beta,除咗ATM同科技指數打個底,入咗幾隻中型嘅科技股(2013,909,3738,有諗過入268,但係估值唔算吸引),而家整體倉位七成至八成。

注:我諗要小心醫療股有機會要讓路比其他行業,所以有一定嘅調整壓力,因為資金都係搵risk return靚嘅機會

弩飛投資(前稱:路飛投資)簡介:專業投資者,前銀行分析員(香港/上海)中港長短倉策略 (0-140%倉位) ,主要希望透過記錄投資的思考過程,跟其他專業投資者交流。
*文章獲弩飛投資授權刊登,文章標題受《Market Digest》更改,原標題:彈弓,佢哋壓緊彈弓!

你可能感興趣

Facebook.png
IG.png