【投資專欄】再談「混沌期」!弩飛:呢期股市唔係賺唔到錢,只係比較難賺(弩飛投資)

股票教學
弩飛:呢期股市唔係賺唔到錢,只係比較難賺

都再想講吓點解係混沌期會選擇將持倉減到好低,但首先要重申多一次:呢個時期唔係賺唔到錢,只係比較難賺,同樣嘅付出得到嘅收穫大大降低:

1)勝率問題:大市嘅寬度比較窄,之前買十隻有九隻升,而家買十隻得五隻升。主要原因係資金變得更加揀擇,少咗幻想多咗理性,所以今次業績期,大家都睇到非常仔細,即使係同一個行業,龍頭同二三線股通常有一定嘅correlation,近排會發現當中嘅關係弱咗好多。

2)賠率問題:之前升得多、跌得少,因此賠率高,而家升跌嘅幅度大得黎比例差唔多,賠率唔靚。至於消息嘅敏感度,之前正面消息會升到爆,負面消息都唔一定跌;而家同樣係多番啲理性,「黑天鵝」亦都多咗(其實係市場對負面消息嘅反應回歸正常)。

3)注碼問題:短時間內自己都唔會All in或者BTFD,每一隻股票嘅注碼都係上年嘅1/3至1/5,純粹係參與下。好多時候我哋都希望快啲賺錢,但係個市場其實有好多時間都處於模棱兩可嘅狀態(即係而家呢個情況其實好常見),唔需要每個時刻都衝到盡,有時都可以比自己休息吓(所以呢排都做多咗按摩、買下野、食下野、同朋友玩poker,對自己好啲)。

Anyways,大家最緊要堅持自己嘅投資計劃,呢一轉應該各有不同(唔再係抱團炒埋同一樣嘢),一齊加油!

弩飛投資(前稱:路飛投資)簡介:專業投資者,前銀行分析員(香港/上海)中港長短倉策略 (0-140%倉位) ,主要希望透過記錄投資的思考過程,跟其他專業投資者交流。

*文章獲弩飛投資授權刊登,文章標題受《Market Digest》更改,原標題:再談「混沌期」

你可能感興趣